KALIBO, Aklan—Nagdangop sa Bombo Radyo ro sangka online seller matapos gina-alegar nga nabiktima it scam ag napiyerdi it kapin sa 20,200 pesos.
Suno sa tagreklamo nga si Reynalin Longcob ag residente it Baclaran, Parañaque nga ko Abril 7,2021 hay nagpadaea imaw it mga stocks it RTW goods matapos nga mag-order kana si Mary Jane Rivera ag residente it Brgy Polo, New Washington.
Pagkatapos nga ma-claim ro anang ginpadaea nga items hay owa sigon nagbayad kana si Rivera ag gin-block pa imaw sa facebook.
Gin-insister pa kara nga klaro ag kompleto ro anang ebidensiya nga nagapakitang si Rivera mismo ro anang naka-istorya sa online.
Samtang, hugot man nga ginapamalibaran it ginareklamong si Mary Jane Rivera ag residente it Brgy. Polo, New Washington nga nag-order imaw ag nakabatun it mga stocks nga nagabalor it 20,200 pesos maghalin sa tagreklamo.
Pagklaro pa kara nga 2018 pa imaw nag-order it tsinelas kat idto pa raya sa Maynila.
Dugang pa kara nga na hack ro anang facebook account matapos karang ginbaligya ro anang cellphone ag plano man nanang magpadueog sa opisina it cyber crime unit sa siyudad it Iloilo agud matumod kung sin-o ro una sa liko it pagpang hack sa anang account kamana man nga malimpyuhan ro anang pangaean.
