Balitang Espesyal ———–Sangka 40-anyos nga ginang sa Thailand ro gina-istoryahan it Thai netizens bangud sa anang kakaibang gimik sa pagbaligya sa online it mga eambong ukon “ukay’’!
Bangud nga haeos tanan nga mga baligya nga ukay ni Kanittha Thongnak hay halin sa mga namatay eon, naisipan nana nga mag-costume bilang sangka zombie sa anang mga live selling online.
Tatlong dag-on eon nga nagabaligya it ukay nga eambong si Kanittha sa tindahan it Chon Daen sa northern Thailand.
Nabobo-oe nana ro mga eambong halin sa sangka Buddhist temple.
May tradisyon abi ro mga Thai nga kon mamatay ro sangka igbata ukon mahae sa kabuhi, ginadaea nanda ro mga eambong sa Buddhist temple agud nga i-donate.
Ro mga eambong nga na-donate hay ginapangamuyuan it mga monghe agud nga mabo-oe ro maeain nga energy kara ag ginabaligya man nanda raya sa mga nagabaligya it ukay-ukay.
Bukon man it mabahoe ro ginakita ni Kanittha kara, nasuportahan man nana ro pagkinahangean it anang pamilya.
Apang bangud sa COVID-19 pandemic owa eon imaw nakabaligya sa tindahan rason nga naisipin nana nga magbaligya online.
Maabu nga kakumpetensiya eon sa online live seller si Kanittha rason nga nabudlayan imaw nga makabo-oe it viewers.
Rason nga naisipan nana nga butangan it gimik ro anang livestream.
Bangud nga may kahilabtanan sa patay ro anang mga ukay, naisipan nana nga mag-costume ag mag-makeup bilang sangka zombie!
Bangud sa anang gimik, nagtaas ro views it anang livestreams.
Halin sa sang dosenang viewers, nakakahakot eon imaw it 4,000 viewers sa anang livestream kada gabi-i.
Sa makaron, mag-eowas sa viewers pati ro kita ni Kanittha hay nagbahoe.
Mas mabahoe pa kumpara kat nagabaligya imaw sa tindahan.
