KALIBO, Aklan—Ginpasiguro it Office of the Presidential Assistant for the Visayas ukon OPAV ro andang bulig sa lokal nga gobyerno it Malay agud nga uman nga mabuksan ro isla it Boracay sa mga turista.
Suno kay Undersecretary Anthony Gerard Gonzales it OPAV suportado it national government ro LGU-malay sa uman nga pagbukas it bantog nga isla sa mga turista basta nga masiguro nga eowas ro mga bisita sa paeag it Covid-19.
Nasayuran nga ko Oktubre it nagtaliwan nga dag-on hay pormal eon nga ginbuksan ro isla, apang makaron hay uman raya nga naging ghost town matapos nga ginsuspinde ro pagbiyahe maghalin sa National Capital Region ag iba pang mga kaiping nga probinsiya bangud sa uman nga pagtaas it kaso it deadly virus.
Ginpahayag ni Gonzales nga kapareho it Cebu nga ginbuksan eon ro ekonomiya pinaagi sa industriya it turismo, masarangan man sigon raya nga mahimo sa Boracay basta nga masunod ro sistema ag proseso para sa Covid-19 community response
Ginpanindugan pa kara nga posibleng mapabilin nga “business as usual” ro turismo kon mabuytan it maayos nga mga opisyal ro anuman nga posibleng pagtaas it kaso it COVID 19.
Kinahangean sigon nga mag isip sanda it mga pamaagi kon paalin nga maibalik ro ekonomiya agud nga malikawan ro mga insidente it gutom, krimen ag pagpakamatay it mga residente bangud sa negatibong epekto it pandemya sa pangabuhian.
Madumduman nga ko 2019 ro tourist arrivals sa isla hay nakalista it kapin sa 2 milyon.
