KALIBO, Aklan — Maga-arangkada eon ro masadya ag makolor nga selebrasyon it lokal nga gobyerno it Kalibo ag Kalibo Ati-Atihan Festival Board nga Opening Salvo it Kalibo Sto. Niño Ati-Atihan Festival 2026 sa Oktubre 8.
Suno kay Jay-ar Arante, media head it LGU Kalibo nga maabu eon man nga mga aktibidad ro ginpahaum para sa ginakabig nga sneak peak it kilaeang Kalibo Señor Santo Niño Ati-Atihan Festival nga ginaeakipan it street dancing, performance it mga gin imbitahan nga mga artista, banda ag iba pang performers kamana man ro pagpasundayag it mga kandidata it Binibini ng Kalibo pageant, mga manami nga pagkaon, ag iba pang aktibidad.
Magapasakop man sa event ro ginatos nga mga Ati-Atihan drummers ag mga tribu ag grupo nga uman nga magabuhi sa mga nagapangunang karsadahon it Kalibo para sa tradisyonal nga sadsad sa kalye.
Pagapangunahan nanday Mayor Juris Sucro ag Vice Mayor Philip Yerro Kimpo ro opisyal nga programa it opening salvo ag pagasundan it sangka makolor nga fireworks display.
Pila sa mga ginatinguhaan it LGU Kalibo nga maimbitahan sa event hay ro sikat nga Elias Band, apang raya hay owa pa it kasiguraduhan.
Sa pihak nga parte, indi pa masiguro makaron nga tiempo kon madugangan ro P1.1 milyon nga cash prize para sa magakampeon nga tribu sa street dancing contest.
