KALIBO, Aklan—Ginkumpirma it Philippine Charity Sweepstakes Office (PCSO)-Aklan nga pormal eon nag-umpisa ro operasyon it bag-ong operator it Small Town Lottery (STL) sa probinsya.
Suno kay Mr. John Martin Alipao it PCSO-Aklan nga ro bag-ong Authorized Agent Corporation makaron it STL sa probinsya hay ro Great Lion Gaming Venture Incorporated kun siin nag-umpisa eon man rayang mag-operate ko adlaw it Huwebes, Hulyo 15, 2021.
Mag-eowas sa Aklan, ro nasambit nga korporasyon man ro nagadumaea it STL operation sa mga kaeapit kara nga probinsya sa Westen Visayas.
Ro pagbola ukon draw court sigon hay gintaeana sa opisina mismo it PCSO nga nahamtang sa Provincial Capitol kun siin ro andang personnel man ro magapatigayun kara.
Madumduman nga nauna eon nga ginpapundo it Aklan Police Provincial Office (APPO) ro operasyon it Peryahan ng Bayan sa bilog nga probinsya.
Raya hay matapos nga magdaog ro Great Lion Gaming venture Incorporated sa ginpatigayun nga bidding it PCSO.
