KALIBO, Aklan—Legal ro “peryahan ng bayan”
Raya ro gin-insister ni Loidan Fuentes, representante it Globaltech Mobile Online Corporation kasunod it pagbukas it outlet it “peryahan ng bayan” sa banwa it Kalibo.
Suno kana nga may andang nagakaigo nga mga dokumento rason nga may otoridad ro pormal nga pagbukas it andang operasyon ko Enero 30, 2021.
Nasayuran nga gintaw-an it Philippine Sweepstake Office ukon PCSO it “go signal” ro Globaltech ko 2014 sa andang operasyon apang napas-eawan nga maka-renew ko 2016.
Ginpahayag ni Fuentes nga ro andang operasyon hay legal base sa desisyon nga ginpaguwa it Court of Appeals ko Pebrero 15, 2019.
Raya hay matapos nga magdaog suno kana sa kaso ro Globaltech, kun sa siin ko Mayo 6, 2019 hay may ginpaguwa nga status quo antes order nga gin-kwestiyon it PCSO.
Gindugang pa ni Fuentes nga ginapakita sa publiko ag ginawaragwag sa kahanginan ro andang pagbola sa andang taeatapan sa Barangay Estancia, Kalibo agud nga maipakita nga owa it daya nga nagakatabu.
Tuyo kara nga mataw-an it pangabuhian ro mga pumueuyu eabi eon ro mga gina-“hire” nanda nga “kabo” nga may nagakaigo nga uniform ag ID.
Maabu eon man suno kana nga mga tawo ro nagataya ag nakadaog sa peryahan.
Agud nga makataya, sa numero nga 1 to 40, daywang numero ro pagapili-an.
Sa 20 pesos nga taya hay pwedeng magdaog it 8,000 pesos.
Porsiyento sigon ro andang ginatau sa mga kabo.
