KALIBO, Aklan—Umpisa sa Agosto 23 hay maga-umpisa eon ro operasyon it Private Motor Vehicle Inspection Centers ukon PMVIC sa probinsiya it Aklan.
Raya ro ginkumpirma ni Engr. Marlon Velez, hepe it Land Transportation Office ukon LTO-Aklan.
Suno kana nga raya hay nahamtang sa barangay pook kalibo nga ginadumaeahan it panay ventures .
Ro PMVIC hay dugang nga requirements sa mga igapa-rehistrong saeakyan sa LTO.
Sa nasambit suno kana nga pribadong inspection center magapatigayon it smoke test ag visual inspection it mga motorsiklo ag light motor vehicles.
Ginklaru pa ni Engr. Velez nga ro mga trucks kapareho it mga 6-wheeler nga truck pataas ukon masobra sa 4,500 kilograms in gross vehicle wight hay exempted sa PMVIC ag pwedeng magpa-smoke test sa mga regular nga smoke emission testing centers.
Sakop kara ro tanan nga mga gin rehistro nga saeakyan ko nagtaliwan nga dag-on sa Kalibo district office.
Apang ro mga ginpa-rehistro sa malay extension office hay pwedeng idtu eon magpa smoke test ag pwedeng indi anay mag agi sa PMVIC.
Samtang, owa sigon it ideya si Engr.Velez sa kon pila ro posibleng pagagastuson sa pagpaidaeum sa PMVIC.
Apang kapin sa 100 hasta 200 pesos ro dugang sa dating ginabayaran.
Engkaso nga bumagsak sa unang test ag na-koreksyunan eon ro mga diperensiya, owa eon it pagabayaran sa re-test ag re-inspection.
Pinaagi sa hi-tech ag computerized nga kagamitan hay eubus nga masayuran kon kapabli pa nga magbiyahe ro sangka saeakyan agud nga makalikaw sa disgasya.
Owa pa man suno kana it may nagpaabot kana it reklamo halin sa mga private nga mga emission testing centers nga maapektuhan.
