KALIBO, Aklan—Sa nagahilapit nga 2025 midterm elections, mas pa nga ginpabaskog it Aklan Police Provincial Office ukon APPO ro pagtinguha nga boe-on ro mga loose firearms sa probinsiya ag siguraduhon nga eowas ag matawhay ro proseso it eleksyon.
Suno kay P/MSgt. Jane Vega, tagapaghambae it APPO nga base sa andang datos umpisa enero 12 hasta Abril 24, 2025, naga-abot sa waeo nga ka tawo ro naaresto ag waeo man ro ginkasa nga search warrant operations.
Kabilugan nga 15 nga mga armas ro nakumpiska halin sa mga gintukod nga mga checkpoint, police response, gun buy bust operations ag iba pang law enforcement operation.
Kadungan kara, gin engganyo it Aklan PPO ro mga indibidwal nga naga-angkon sa gihapon it mga bukon it lisensyadong armas nga isurender eagi ro mga raya ukon magpangayo it bulig sa andang taeatapan, natungdan nga municipal police stations, ukon sa mobile force company sa mga dapat nga obrahon.
