NATIONAL News —- Kulong ro sangka Police Lieutenant nga miyembro it PNP Drug Enforcement Group sa CALABARZON bangud sa mga kasong estafa ag illegal gambling.
Ginkilaea ni CALABARZON PNP Regional Director, P/BGen. Antonio Yarra ro pulis nga si Lt. John Kevin Menes nga dati eon nga nakabaton it award bangud sa kampaniya kontra iligal nga droga.
Base sa report, naaresto si Menes samtang nagahampang it e-sabong sa sangka Off-Cockpit Betting Station sa parte it Ramon Magsaysay Blvd, Nagtahan sa Sta. Mesa, Manila ko Miyerkules.
Ginreklamo si Menes it anang nabiktima matapos nga boe-on ro saeakyan it tawuhan nga si Pat. Melvin Bojocan Barbo kun sa siin nahimo pa kara nga i-prenda ro saeakyan sa balor nga P170,000 para eang italpak sa e-sabong.
Kat marekober it pulisya ro saeakyan, insigida nga nagpasaka it kaso kontra kana ro gin-prendahan ag idtu eon nabuking nga may utang pa si Menes sa e-sabong operator nga nagabalor it P15,000.
Mag-eowas kara, nabasayuran pa nga under restrictive custody si Menes sa CALABARZON PNP Regional Headquarters sa Camp Vicente Lim matapos makadispalko it buy-bust money nga nagabalor it haeos tunga sa milyong piso.
