KALIBO, Aklan — Ginbulgar it negosyanteng si Crisostomo “Cris” Aquino, ro resort owner it kontrobersiyal nga West Cove Resort sa isla it Boracay nga sambilog man sa violator si Mr. Rowen Aguirre, ro Executive Assistant to the Mayor it LGU-Malay.
Sa interview it Bombo Radyo Kalibo, ginpahayag kara nga ro 7-Eleven nga makit-an sa beachfront hay ginapanag-iyahan ni Aguirre nga nasayurang nag-eabag man sigon sa 25+5 meters easement.
Suno kana, kinahang-ean nga ipaathag it opisyal kon ham-an it uwa pa nahueag ro nasambitang establisyemento sa pihak it pag-eabag kara.
Ginpahayag dugang nga sangka diversionary tactics eamang it lokal nga gobyerno it Malay ro pagpasarado sa anang resort agud ma-divert ro atensiyon halin sa mga nag-eabag sa 25+5 meters easement.
Samtang, hugot nga ginpamalibaran ni Aguirre ag ginpahayag nga compliant ro anang building ag uwa sanda it nabaton nga Notice of Violation (NOV).
Engkaso sigon nga sambilog sanda sa mga nag-eabag, haom raya nga ipaguba ro nasambitang istraktura.
Suno pa kay Aguirre, bukon it imaw ro violator kundi si West Cove Resort owner Cris Aquino bangud raya ro gintaw-an it closure order.
