KALIBO, Aklan—Naging madinaeag-on ro opisyal nga pagbisita ni South Korean President Yoon Suk-yeol sa Amerika.
Suno kay Bombo International Correspondent Greg Aguilar it California, USA nga nakipagkita ro nasambit nga matag-as nga opisyal it South Korea kay US president Joe Biden sa White House.
Una kara sa bilateral meeting it daywang ka presidente, pumabor ro South Korea sa Amerika nga indi maglunsar it kaugalingon nga nuclear weapons.
Raya hay bilang sabat sa promisa it Estados Unidos nga pagpadaea it nuclear-armed submarines sa South Korea.
Ro nasambitang kasugtanan sigon hay magapabaskog pa sa kooperasyon it daywang nasyon sa pagsukoe sa pag-atake it North Korea.
Ginpahayag dugang ni Aguilar nga naging performer sa madinaeag-on nga state dinner sa white house si Filipina international singer Lea Salonga.
Naging magkaalyado ro South Korea ag Amerika sa idaeom it 1953 Mutual Defense treaty kon sa siin makaron nga 2023 ro pag-marka it ika-70 anibersaryo it alyansa it US ag South Korea.
