KALIBO, Aklan — Kinuwestiyon ni Provincial Environment and Natural Resources Officer Valentin Talabero it Department of Environment and Natural Resources (DENR)-Aklan kun ham-an gin eakip ro anang pangaean sa mga kinasuhan may kaangtanan sigon sa nagpabayang opisyal nga ma-amligan ro isla it Boracay.
Suno sa PENRO officer nga ro nasambitang kaso hay owa it basehan, malisyoso ag kalokohan.
Ku Pebrero 14, 2018 eamang sigon kat imaw hay nagpungko sa pwesto ag bukon sanda it sakop it Department of Interior and Local Government (DILG).
Sa pamatuod sigon hay imaw pa ro nagpagowa it show cause order ag notice to vacate sa tanan nga mga naga estar sa timberland sa isla.
Gin pahayag dugang pa ni Talabero nga masakit para kana ro natabo bangud owa imaw it kasayuran sa kaso kun siin owa sigon raya it proper coordination sa andang regional director ag bisan pa kay Environment Secretary Roy Cimatu.
Sa pihak nga parte, dismayado ag naduea sigon ro anang respeto kay DILG Assistant Secretary Epimaco Densing III sa owa it baeasihang kaso.
Nagtuga sigon raya it low morale sa anang mga katrabaho sa bug-os nga Western Visayas ag gin kaakig it anang pamilya ag mga maeapit nga amigo ag amiga.
Mag eowas kay Talabero, kinasuhan it graft sa Office of the Ombudsman si Aklan Governor Florencio Miraflores ag 16 nga iba pang opisyal it banwa it Malay, Aklan.
Kaparehong akusado ni Miraflores sanday Malay, Aklan Mayor Ciceron Cawaling, Vice Mayor Abram Sualog ag miyembro it municipal council kamana man ro provincial environmental officers ag mga opisyal it barangay it Boracay.
