VALENCIA REGION, Spain – Nauli sa gulo ro dapat kunta hay pagbisita ni King Felipe VI, Queen Letizia kaibahan ro presidente ag alkalde it Valencia Region, ro lugar nga eubos nga gindaeasa it nagtaliwan nga baha sa Spain.
Pahayag ni Bombo International Correspondent Maria Edzel Lamparero Lopez, imbis sigon nga magtawhay ro nasambit nga region eain ro natabo bangud ginabasoe it mga tawo ro presidente ag alkalde.
Pagsaysay ni Lopez nga ro gusto sigon it mga pumueoyo hay nagpadaea eagi it mga magabulig sa pag-usoy sa search and rescue operations ag pagbangon it Valencia ro mga nasambit nga opisyales.
Maabo kanda ro mga magueang nga uwa nakahalin sa mga nursing homes sa nasambit nga rehiyon.
Pagsalarawan nana nga ginsug-aeaw it singgitan it mga tawo ro mga raya ag ginbansagan nga “killer” bangud kun madasig eamang sigon mga rescuers uwa sigon kunta nag-abo ro numero it mga namatay.
Kasunod it singgit ro paghaboy it eutay sa mga opisyales ngani napilitan nga magbalik sa anang saeakyan ro presidente apang nagpadayon gihapon ro hari ag reyna sa paglibot ag pakipagdayalogo.
Suno kay Lopez nga ginapaningitan it mga tawo nga magpanaog sa pwesto ro presidente ag alkalde it Valencia.
Sa makaron, padayon pa ro ginahimo nga search and rescue operations sa mga lugar nga gindaeasa kun siin magsobra 200 eun ro patay.
