KALIBO, Aklan — Mas pang ginpabaskog it Malay Police Station ro andang crackdown kontra sa mga colorum ukon owa naka-rehistro nga mga motorsiklo ag iba pang saeakyan sa bulig it Land Transportation Office ukon LTO, Highway Patrol Group ukon HPG, Municipal Transportation Office ag Malay Auxiliary Police ukon MAP sa isla it Boracay.
Suno kay P/Capt. Dexter Brigido, OIC chief of police it Malay PNP nga nagapatigayon sanda it operation Oplan Colorum agud nga ma-inspeksyon ro mga saeakyan kon naga-angkon ro mga raya it nagakaigo nga papeles kapareho it permit to transport, rehistro ag drivers license sa mga nagamaneho.
Ginatutukan sigon nanda makaron ro mga pasaway nga drivers ag colorum nga mga saeakyan nga kon sa siin ro iba sa mga raya hay ginagamit sa illegal activities.
Gindugang pa ni Capt. Brigido nga regular sanda nga nagapatigayon it checkpoint agud nga madakpan ro mga posibleng tinakawan ukon delingkwenteng nga behikulo sa banwa it Malay ag Boracay.
Sobra-sobra sigon ro mga saeakyan sa isla rason nga target nanda nga i-pull-out ro mga excess vehicles .
Amat-amat eon man nga gin-phase out sa isla ro mga saeakyan nga may gatong nga gas ag diesel agud nga mapahagan-hagan ro polusyon .
