KALIBO, Aklan — Mas pang ginpabaskog ro Oplan Kandato campaign it Bureau of Internal Revenue ukon BIR sa probinsiya it Aklan.
Suno kay BIR-Aklan revenue district officer Nelia Demalata nga umpisa nga magpungko imaw sa pwesto ko Hulyo 26 hay daywang establisimento komersiyal eon nga ginaeakipan it sangka grocery store ag restaurant and cafe ro andang ginpasaraduhan bangud sa kapas-eawan nga makabayad it tama nga buwis sa tama nga oras.
Sambilog pang estabilisimento ro target pa nanda makaron nga iga-kandado, nga kon sa siin, nagpamalibad anay imaw nga idetalye ro mga impormasyon .
Gindugang pa ni Demalata nga naga-agi sa due process antes ro pagpasarado sa mga establisimento ag sa oras nga makabayad it tama nga buwis hay insigidang ginabo-oe ro closure order.
Gina-monitor sigon nanda raya pinaagi sa cash register.
Ginpaathag pa it revenue district officer nga ro pila sa mga basehan sa pagpatigayon it Oplan Kandado program hay ro kapas-eawan nga mag-isyu it resibo ag mag-file it value-added tax returns, kapas-eawan nga makapa- register ag understatement of taxable sales by 30 percent or more.
Nagapadaea sigon sanda it sueat sa nagapanag-iya ag gina-abisuhan it andang bayolasyon .
Engkaso suno kana nga indi magbayad ro sangka negosyante, ginadaea nanda ro kaso sa andang legal department agud nga maproseso ro pagpasarado sa establisimento .
Angot kara, ginpadumdum it BIR ro mga business establishments nga magbayad it tama nga buwis ag on-time agud nga malikawan ro mapasaraduhan .
