KALIBO, Aklan—Gin-ako it Office of the Provincial Veterinarian nga limitado ro pondo it provincial government pang ayuda sa mga hog raisers nga namatayan it baboy bangud sa pagpanaeasa it African Swine Fever ukon ASF virus sa bilog nga probinsya it Aklan.
Suno kay Dra. Mabel Siñel it OPVET Aklan nga sa P25 milyon pesos nga quick response fund it probinsya hay P10 milyon pesos ro gin-alokar para sa pang-ayuda sa mga apektadong hog raisers.
Apang, P7 milyon pesos eamang ro pwede nga ibayad bangud nga ro P3 milyon pesos hay gintaeana sa andang taeatapan para sa iba pa nandang kinahang-eanon ag mga logistics.
Bangud kara, igaprayoridad nanda ro mga ginpaidaeom sa culling nga mga baboy nga nagaabot eon makaron sa 1,445 ag posible pang madugangan bangud nga may mga nakataeana pang baboy nga iga-culled.
Ro pagbayad sa mga raya hay kada batches kon sanday sin-o ro una sa andang listahan nga ginpaidaeom sa culling ukon ginpatay pinaagi sa electric ro andang mga alagang baboy bilang precautionary measures nga inde eon mag-eapta ro ASF virus.
