KALIBO, Aklan–Ginduea it Office of the Provincial Veterinarian (OPVET) ro pagkabaeaka it mga hog raiser nga makasueod ro African Swine Fever (ASF) sa probinsya it Aklan.
Raya hay kasunod it mas pang pag-eapit it paeag it ASF sa probinsya matapos nga makalista it kaso ro Iloilo ag Maayon, Capiz.
Ginklaro ni Dr. Joseph Lachica it OPVET-Aklan nga may naga-eksister eon nga Executive Order ro gobyerno probinsyal nga ginpagguwa ko nagtaliwan nga dag-on.
Nakabaehag kara ro pagbawae sa pagsueod it mga karne it baboy ag frozen meat products halin sa mga ASF infected areas ag kaiping nga mga probinsya.
Mag-euwas kara, nagapabilin man ro pagpatuman it mga border control checkpoint sa mga entry ag exit point it Aklan.
Sa kamatuoran suno kana hay nakakumpiska sanda kabi-i it pork meat products sa bahin it Altavas.
Nakasueod ro kargamento sa maleta ag gintabunan it mga eambong.
Naghinyu man si Dr. Lachica it hugut nga kooperasyon sa mga pumueoyo ag barangay official partikular ro maeapit sa mga border nga maging mapagbantay.
Nasayuran nga ro ginapasugtan eon lang nga makasueod nga karne sa probinsya hay halin sa Region 7 partikular sa Negros.
Ro probinsya it Aklan ag Antique eon lang ro nabilin nga ASF free sa bilog nga Western Visayas.
