KALIBO,Aklan– Ginpaathag it Office of the Provincial Veterinarian ukon OPVET kon sa siin maadto ro kapin sa P1,260,000 pesos nga kaparte it P3 milyon pesos nga logistics nga ginbuoe sa P10 milyon pesos nga quick response fund it gobyerno probinsyal para sa mga apektadong hog raisers it African Swine Fever ukon ASF virus.
Suno kay Dra. Mabel Siñel it OPVET Aklan nga ro nasambit nga kantidad hay igata-o sa culler, sample collector, documenter, specimen handling and processing ag restrainer nga ginakomponeran it inde magnaba sa 20 katawo.
Sanda hay pagabayaran it minimum wage nga P350 pesos kada adlaw.
Ginpaathag dugang nga sanda ro magatrabaho sa mga apektadong munisipalidad ukon mismong barangay nga may mga gina-culled nga baboy.
Ginpasiguro man ni Dra. Siñel nga ro ginpaguwa nga pondo it gobyerno probinsyal hay makaabot sa mga apektadong hog raisers nga ro andag mga sapat hay ginapaidaeom sa culling.
Nagpanindugan man raya nga ro andang taeatapan hay uwa it interest sa kantidad it kwarta nga ginaayuda sa mga hog raisers ag ro nagakwestyon kanda hay hilway nga magpadueong sa anang opisina agud nga mapaathagan it husto.
