KALIBO, Aklan—Mas pang ginpabaskog it Office of the Provincial Veterinarian (OPVET)-Aklan ro andang kampanya ag monitoring kontra sa African Swine Fever ukon ASF.
Raya hay matapos nga makasueod eon sa Visayas ro ASF partikular sa probinsya it Leyte makaron nga Enero 2021.
Suno kay Dr. Joseph Lachica it OPVET-Aklan, dag-on 2019 pa nag-umpisa ro andang monitoring matapos nga unang maka-detect it ASF outbreak sa Luzon.
Kung siin, Enero 2020 hay nakalista man it unang kaso ro Mindanao.
Bangud sa nagapaeapit eon ro paeag it virus sa mga kasapatan sa probinsya it Aklan hay mas pang ginhugtan it OPVET ro andang pagbantay sa mga borders kabulig ro Bureau of Animal Industry.
Sambilog suno kana ro Western Visayas sa gina-agyan it mga meat products maghalin sa ASF affected areas.
Owa eon man sigon it baboy nga nagasueod sa Aklan halin sa ibang lugar maeuwas sa Romblon bangud maeapit raya sa Caticlan.
Gindugang pa kara nga ro Western Visayas ro sambilog sa mabahoe nga supplier it karneng baboy sa Luzon.
Suno pa kay Dr. Lachica ginabawae eon man nanda ro pagsueod sa Aklan it mga behikulong may kargang karne nga maghalin sa ibang probinsya kug siin port to port nga pagbyahe eamang it baboy ro andang ginapasugtan agud makalikaw sa paeag it ASF.
Ginpahayag dugang nga owa pa it bakuna para kara ag obligado ro National Government nga patyon ro alagang baboy it mga hog raisers sa sueod it 500 meters engkaso nga ma-detect raya nga tinamaan it virus.
Pila sigon sa mga sintomas it ASF hay nagapamuea ro panit it alagang baboy kung siin madasig rayang makatapon.
Haeos 94 porsyente sigon it mga supply it karneng baboy sa Aklan hay halin sa backyard raisers samtang 6 porsyento ro halin sa commercial raisers.
