KALIBO, Aklan—Naka-alerto makaron ro Office of the Provincial Veterinarian (OPVET)-Aklan agud nga mabaeabagan ro pagsueod it bird flu virus.
Raya hay matapos nga makalista eon it pilang kaso sa bahin it Luzon.
Suno kay Provincial Veterinarian II Dr. Joseph Lachica it OPVET-Aklan nga naga-abot eon sa waeo nga bird flu outbreak ro nailista sa nasambit nga rehiyon.
Nakabaehag sigon sa ginpagguwa nga bag-ong Executive Order ni Governor Florencio Miraflores nga ginabawaean anay ro pagsueod it mga buhi nga manok ag pispis sa probinsya para malikawan ro pagkalhit it virus.
Samtang, ro mga produkto hay ginapasugtan man nga makasueod kung siin kinahang-ean ro maidid nga pag-inspeksyon ag pagdahan.
Nasayuran nga ro bird flu virus hay madasig nga magkalhit ag posibleng makatapon sa tawo.
Bangud kara, ginlaylayan ni Dr. Lachica ro publiko nga pabukaean ag eahaon it mayad ro karne it manok para makalikaw sa virus.
Base sa datus it taeatapan, owa pa nasudlan it African Swine Fever (ASF) ag H5N1 virus ro probinsya it Aklan.
Ginpasiguro man kara nga hugut ro andang ginahimo nga pagbantay sa kada border para masiguro indi makasueod ro kontaminado nga sapat ag produkto.
