KALIBO, AKLAN— Gin kumpirma it Office of the Provincial Veterinarian (OPVET) nga pispis nga salimbabatang ro naga hapun sa bahin it Banga Rotonda ag indi makabig nga peligroso bangud sa native it Aklan ro nasambitang mga raya ag bukon it migratory birds.
Suno kay Dr. Mabel Sinel nga distorted ro mga pispis matapos nga gin putoe ro daywang ka mga maeagkung kahoy maeapit sa Banga Parish Church nga andang gina hapunan rason nga nag usoy it bag-ong maestaran.
Apang, makabig sigon suno kay Dr. Sinel nga may peligrong daea sa ikamayad nga eawas ro mga higku it pispis bangud posibling magatuga raya it bacterial infections.
Apisar kara, gin klaro man it veterinarian nga indi raya magatao it peligro sa mga poultry.
Gin advise ni Dr. Sinel nga mas makapamayad nga makipag-coordinate ro LGU-Banga sa Department of Environment and Natural Resources (DENR) agud mataw-an it giya sa kun paano ro ensaktong pagtabog sa mga salimbabatang.
Gin laygay pa kara nga mas makapamayad kun magpatigayun it paglimpiyo ro LGU-Banga kada adlaw sa mga higku it pispis agud mapahagan-hagan ro mabahong hugom nga gina krear kara nga nagatao it perwisyo sa mga pumueoyo maeapit sa lugar.
Nasayuran nga partikular nga naga hapun ro mga pispis sa kable it Akelco kamana man sa mga telephone ag cable wires.
