KALIBO, Aklan—Hugut nga ginapatuman ro ordinansa angot sa load limits para sa mga truck.
Raya hay kasunod it reklamo it mga opisyal ag residente nga pila sa mga truck nga naga-agi sa provincial road sa parte it barangay Bacan, Banga hay overloaded it kargang baeas rason nga madaling nagakasamad ro karsada sa nasambit nga lugar.
Suno kay Provincial Treasurer Dino Villaruel nga ro sin-o man nga madakpan nga naga-eabag sa ordinansa hay ginapapanaugan it multa.
Aminado man ro opisyal nga limitado ro andang tawuhan nga nagabantay sa lugar eabi pa kon sabado ag domingo bangud sa pagbawas sa mga job order it Provincial Capitol kasunod it pagpanaeasa it covid 19 pandemic.
Apang natinguhaan sigon nanda nga mabutangan it tawo nga naga-monitor sa lugar maskin weekends , apang problema gihapon ro mga nagabantay pagkatapos it alas-5 it hapon , kun sa siin maabu pang mga trucks ro naga-agi.
Ro mabahoe nga share suno kana it kita halin sa quarrying hay ginbalik it kapitolyo sa natungdan nga munisipyo ag barangay rason nga kunta hay sanda man ro may mabahoe nga papel sa monitoring.
Gindugang pa ni Villaruel nga owa nanda gina-tolerar ro mga overloading nga truck bangud nga kon igakumpara ko nagtaliwan nga mga dinag-on hay nagtaas makaron ro andang nakolekta nga multa.
Obligado suno kana nga magsunod ro mga trucks sa gintaeana nga bug-at ukon gross vehicle weight.
Tuyo sigon kara nga maprotektahan ro provincial roads sa kahalitan nga ginatuga it mga overloaded trucks.
Mag-eowas kara, gastos sigon raya sa parte it gobyerno probinsiyal sa kada may mga nagakasamad nga karsada tuga it mga mabug-at nga saeakyan.
Resposibilidad man suno kana it mga tag-ana it truck nga siguraduhon nga bukon it overloaded ro andang mga saeakyan.
