KALIBO, Aklan—Nakapasar eon sa unang pagbasa ro sangka ordinansa angot sa mental health care sa barangay council it Poblacion, Kalibo.
Suno kay punong barangay Neil Candelario it Poblacion, Kalibo nga ro nasambit nga ordinansa hay gin-author ni kagawad Ken Fegarido, kun sa siin raya hay sandig sa Philippine Mental Health Law ukon Republic Act 11036 nga ginpirmahan ag gin-obra nga laye ni dating President Rodrigo Duterte ko 2018.
Angot kara, tuyo it ordinansa nga mapabaskog pa ro mga tikang ag programa para sa mga indibidwal nga mentally challenge ukon may diperensiya sa paminsaron nga padayun nga naga-inabu ro andang numero sa banwa it Kalibo.
Kamana man ro proteksyon sa kamaeayran it mga indibidwal nga may mental health disorder, ro nagakabagay nga pagtrato kanda nga may dignidad, pagrespeto ag hustisya.
Mag-eowas kara, ginaduso man nga mapakalhit ro mental health awareness sa publiko agud nga mapabaskog ro pagtinguha it sangka indibidwal nga makaeampuwas sa ginabatyag nga stress ag depression.
Samtang, nauna eon sigon sanda nga naghinyu kay Aklan 1st district congressman Carlito Marquez nga makatukod it sangka mental health facility sa banwa it Kalibo.
