KALIBO, Aklan–Aprubado eon it mga miyembro it Sangguniang Bayan it Kalibo ro Ordinance No. 2023-0014 nga ginpasa ni SB member Matt Aaron Guzman.
Tuyo kara nga makatao it dugang nga benepisyo ag prebilihiyo sa mga Child Development Workers (CDW) sa banwa it Kalibo.//Suno kana, malipayon imaw nga nataw-an eon it katumanan ro mabuhay eon nga ginapangayo it Child Development Workers sa mga kabarangayan.
Nakabaehag sa ordinansa nga magatao ro lokal nga gobyerno it dugang nga P5,000 para sa bueanan nga sweldo it mga CDW ag P1,000 nga minimum mat-a ro halin sa barangay.
Mag-euwas kara, kada Disyembre hay may paga-eauman man sanda nga bunos nga kapin sa P2,000.
Ro pondo sigon nga pagabue-on sa General Fund Proper ukon Aid to Barangay budget it lokal nga gobyerno.
Ginpaathag pa kara nga indi matawaran ro sakripisyo it mga CDW nga nagatao it andang oras ag atensyon para matutukan ro pagtuon it mga unga.
Nagakadapat eamang suno kana nga maitao kanda ro nagakaigo nga honorarium.
