Ginaduso sa makaron ni Kalibo Sagguniang Bayan Member Philip Kimpo sa konseho ro sangka ordinansa nga pagabaskugon pa ro campus journalism sa banwa it Kalibo.
Tinutuyo kara nga taw-an it government support ro mga Kalibonhon nga manugsueat para mas maging haom sandang magsabak sa mga kompetisyon.
Suno sa konsehal nga ro nasambit nga ordinansa hay magataeana man it budget kada dag-on para sa mga training, seminar workshops ag travel subsidy it mga Kalibonhon nga makasueod sa National ag Regional Schools Press Conferences (NSPC & RSPC).
Ginpahayag dugang pa kara nga ro mga campus journalists hay kapareho man it mga atleta nga sangka bugae ag dungug it banwa it Kalibo ag bilog nga probinsya it Aklan.
Angot kara,igaduso ro nasambit nga ordinansa sa bulig man ni Dennis Bontogon, sangka manugturo sa Kalibo Pilot Elementary School, ag sangka manugsueat, historyador, ag batikang school paper adviser sa banwa it Kalibo.
Sa pihak nga parte, Si Kalibo Councilor Philip Kimpo, hay sangka manugsueat ag mamamahayag man nga nagserbi bilang editor-in-chief sa sangka media outlet antes maging konsehal sa banwa it Kalibo, ag naging madinaeag-on man sa kategoryang newswriting sa NSPC 2002 ag RSPC ko nagtaliwan nga dag-on 2001.
