Gin laid on the table sa pangaywang pagbasa sa ginpatigayon nga regular session it Sangguniang Bayan it Kalibo ro ordinansa nga ginaduso ni SB member Raymar Rebaldo nga himuon nga limang dag-on ro validity it franchise it mga tricycle nga nagabyahe sa banwa it Kalibo.
Raya hay matapos nga uwa it nabilog sa mga naging opinyon ag suhestyon sa plenaryo it mga konseho.
Medyo may pagkakomplikado ro nasambit nga proposisyon kon siin madugangan it daywang dag-on ro validity it tricycle franchise halin sa presenteng ordinansa nga tatlong dag-on.
Sambilog sa mga rason it konseho hay madueaan it mabahoe nga income ro lokal nga gobyerno sa sueod it daywang dag-on.
Mag-eowas kara, ro iba hay nagapabor sa proposisyon apang kinahang-ean nga dugangan ro andang payment sa rason nga madugang man ro dinag-on it validity it nasambit nga dokumento.
Bangud kara, ginpakamayad it konseho nga ipaiway eon lang anay ro nasambit nga proposisyon agud nga mapiniinuhan ag mabusisi it husto kon anu ro mayad nga pagahimuon nga maging paborable sa magtimbang nga parte.
