Igapatuman gihapon it Senate Sergeant at Arms ro warrant of arrest nga gindihon it Senado kontra kay Shiela Leal Guo.
Raya hay ginkumpirma ni Senate Sgt-At-Arms Retired General Roberto Ancan nga ginpadaea ni Senate President Francis “Chiz” Escudero.
Nadakpan it mga otoridad sa Indonesia si Shiela Guo, ro igmanghod ni Alice Guo ag si Cassandra Li Ong, sambilog sa mga incorporators it Lucky South 99 nga gina-imbestigahan sa Porac, Pampanga.
Apang bago raya pamatuman hay gin-abisuhan it OSAA base sa giya it Department of Justice (DOJ) nga ipadaeom anay sa kustodiya it National Bureau of Investigation o NBI sanday Shiela ag Cassanda para makadihon eun it kaso kontra Cassandra ag makahimo man it inquest proceedings ro Bureau of Immigration kontra kay Shiela sa immigration charges.
Samtang, ginsugo man ni Escudero si Ancan nga sumunod ag padayunon ro pakikipag-angot DOJ, NBI, BI, ag PNP para sa maayos ag matawhay nga pamaagi kontra sa daywang personalidad.
Makaron man, ginpasaeamatan man ni Senadora Risa Hontiveros ro Indonesian authorities bangud sa madasig nga aksyon kara agud maaresto sanday Shiela ag Cassandra.
Ginasaligan ni Hontiveros ro pag-adto nanday Shiela ag Cassandra Ong sa igakasang pagpamati it tatlong komite sa Senado sa Martes, Agosto 27.
Pamiliit it senadora, magapanabat ro daywa ingkaso nga indi nanda adtunan ro igakasa nga imbestigasyon.
Nakasentro man ro pagpamati sa kung paano nakapanaw sa nasyon si Alice Guo.
