KALIBO, Aklan—Gin-engganyo it Office of the Senior Citizen Affairs (OSCA)-Numancia ro mga senior citizen nga makibuylog sa vaccination program it gobyerno.
Suno kay Jovencio Angeles, OSCA-Numancia Head nga ginkasubo kara ro naging resulta it unang vaccination rollout sa andang banwa para sa A2 priority.
Ko nagtaliwan nga adlaw it Sabado ro ap-at nga barangay nga naunang gin-salang sa inoculation hay ro Albasa, Navitas, Marianos ag Pusiw kun siin 190 eamang ro nagka-interes nga magpabakuna.
Ginasugid nga naga-abot sa 4,334 ro kabilugang numero it mga senior citizen sa 17 ka mga barangay it Numancia.
Ginlaygayan man kara ro mga kaparehong may edad nga magpabakuna agud makaangkon it dugang nga proteksyon kontra sa Coronavirus Disease 2019 ukon COVID-19.
Indi dapat sigon magkahadlok bangud nagatao man ro mga doktor it rekomendasyon antes ro pagturok.
Ro pagpabakuna suno kana ro sambilog sa yabe agud amat-amat nga makabalik ro tanan sa dating pagpangabuhi nga owa it ginapatuman nga restrictions.
Makaron nga adlaw it Martes ginaeauman nga magapabakuna ro kapin sa 270 ka mga senior citizen halin sa Barangay Bulwang, Dongon, East, Dongon West ag Brgy. Joyao-joyao, Numancia.
