KALIBO, Aklan — Temporaryong ginpasarado it munisipyo it Kalibo ro sangka ostrich farm sa Brgy. New Buswang, Kalibo, Aklan.
Sa interview it Bombo Radyo, ginpahayag ni Ramon Dio, sangka negosyante ag nagapanag-iya it farm nga gin-abisuhan imaw nga magbo-oe anay it nagakaigo nga permit partikular ro mayors permit agud nga makapadayun sa anang operasyon.
Suno kana nga nag-umpisa eamang sa daywang ostrich ro anang gin-alagaan masobra sa sang dag-on eon ro nagtaliwan, apang naga-abot eon raya makaron sa 23 .
Owa pa suno kana naeakip sa nasambit nga numero ro mga isiw it ostrich nga anang gina-alagaan .
Ginpahayag dugang nga naging viral sa facebook ro anang mga alagang ostrich rason nga naging atraksyon raya makaron .
Plano man it tag-ana nga isaylo sa ibang lugar nga mas maeapad ro anang farm .
Ginklaru man nana nga owa imaw nagasukot it entrance fee ag ro ana eamang nga ginabaligya hay ro feeds para sa mga gustong maexperiensiyahan ro magpakaon it ostrich .
Owa sigon nana ginabaligya ro mga mabahoe eon nga ostrich kundi ro mga itlog eamang kara ag mga isiw .
Sa pihak nga parte, legal suno kana ro anang pag-angkon it nasambit nga mga sapat nga kaabuan hay naghalin sa ibang mga zoo ag animal kingdom nga naka-rehistro sa Department of Environment and Natural Resources (DENR).
Mag-eowas kara, matibay suno kana ag nagakabagay sa mga sapat ro andang kulungan .
Samtang, mag-eowas sa mga ostrich, makita man sa ugsaran it baeay ni Mr. Dio ro iba pang kasapatan kapareho it civet cat, pilang klase it parrot , bear cat, iguana, mga isda, peacock, buwaya, phyton ag iba pa.
Handum nana nga ro anang farm hay maging atraksyon sa bilog nga Aklan ag makaangkon it ostrich riding sa ulihing mga inadlaw .
