KALIBO, Aklan — Aminado si outgoing Kalibo Mayor William Lachica nga nagakanugon imaw matapos nga mapas-eawan sa nagtaliwan nga eleksyon bangud nga indi eon sigon kara mapatuman ro anang mga mayad nga plano para sa kaumwaran it probinsiya it Aklan .
Napierde si Lachica kontra sa hugut nga kasumpong nga si Joeben Miraflores bilang gobernador it Aklan .
Nagpasaeamat man si Lachica sa mga nagpati ag nagsakripisyo para sa anang kandidatura maskin nga owa ginswerte nga magdaog.
Samtang, plano ni Lachica nga taw-an it atensyon ro anang pamilya matapos nga magpanaog sa pwesto bilang alkalde it Kalibo nga nagaserbisyo sa sueod it siyam nga dag-on .
Pagabuligan man sigon nana ro anang manghud nga si retired Kalibo Municipal Engineer Emerson Lachica nga magabueos kana sa pwesto eabi eon ro pagpangayo it bulig sa nasyunal agud nga mapadayun ro mga proyekto nga naumpisahan it anang administrasyon nga makabig nana nga pinakamanami nga legasiya nga maaywan .
Ginpabugae man nana nga sa anang pagdumaea hay humakot it nagkaeain-eain nga awards ro LGU-Kalibo.
