Nauli sa kasubo ro ginplano nga outing it sangka pamilya kaibahan ro andang iba pang himata matapos nga maaksidente ro Elf truck nga andang ginsakyan nga gintunaan it pagkamatay it daywang ka mga indibidwal.
Sandig sa report, napueo ro nagapabilin nga nakaconfine sa Aklan provincial hospital kon sa siin waeo sa mga raya hay residente it Brgy. Baybay, Makato ag daywa kanda ro taga-Brgy. Ochando, New Washington.
Una kara, ginpahayag ni Femmy Guillermo it Brgy. Ochando, New Washington ag lola it daywang dag-on nga ongang namatay nga ginplano ro nasambit nga outing sa Malumpati sa probinsya it Antique kon sa siin makit-an ro kasadya sa mga raya.
Apang, ginkakibot nanda ro balita nga naaksidente ro mga raya ag kaibahan sa namatay ro anang apo nga nagaisaeahanong onga it anang kamanghuran nga onga.
Samtang, ro sambilog pang namatay hay ro 19 anyos nga daeaga nga ginhapit eamang sa Brgy. Baybay, Makato.
Sa inisyal nga imbestigasyon sandig sa pahayag it driver nga ginkilaeang si Raul, uwa sanda madayon sa Malumpati bangud nga naharang sanda sa quarantine checkpoint bangud sa daea nanda nga mga karne nga hugot makaron nga ginabawae nga makasueod sa nasambit nga probinsya bangud sa ASF.
Angot kara, nagdesisyon sanda nga bumalik ag ipadayon ro outing sa Hurom-hurom nga makit-an sa Brgy. Laserna Nabas, apang sa Brgy. Nagustan pa eamang hay gulpi nga eomupok ro kariton it Elf truck nga gintunaan it andang pagkadisgrasya.
Umawas sa behikulo ro mga sakay nga biktima ag nakaangkon ro mga raya it kasakitan ag lastro sa nagkaeain-eain nga parte it andang kaeawasan.
Samtang, ro insidente hay padayon pang ginaimbestigahan it Nabas Municipal Police Station.
