KALIBO, Aklan—Nagapabilin nga ro isyu sa ‘overloading’ it mga dump truck halin sa quarry site ro ginatumod nga rason sa pirmeng pag-repair sa karsadahon nga sakop it barangay Bacan, Banga.
Suno kay Bacan Barangay Kagawad Robinson Rampola nga dapat nga hugut nga bantayan ro mga naga-agi nga dump truck, adlaw ag gabi-e sa nasambit nga lugar ag ipa-agi sa weighing scale agud nga malikawan ro overloading nga imaw ro ginaturo nga rason it pirmeng pagkasamad it karsada.
Kaeabanan sigon nga nagahalin ro mga truck sa quarry site sa barangay Taba-ao, Sigcay ag Badiangan.
Samtang, nagapati man si Kagawad Rampola nga base sa anang obserbasyon, sambilog pa sa posibleng rason it madali nga pagkasamad it karsada nga proyekto it Provincial Engineering Office hay ro kawad-an it drainage system.
Kaeabanan sigon nga nagapunpon ro tubi sa kilid it karsada nga naga-contribute sa anang madali nga pagkasamad.
Maskin sigon ro andang barangay council hay natak-an eon sa mga reklamo nga ginapaabot kanda eabi eon kon nakakaangkon it aksidente sa lugar.
Nasayuran nga ko 2021, haeos daywang beses nga ginpaidaeum sa repair ro nasambit nga daeanon ag makaron nga dag-on hay may mga portion nga owa pa natapos.
Nag apela man ro konseho nga indi eon pagpabuhayon ro mga gina-obra nga repair nga makabig nga “takaw aksidente”.
