KALIBO, Aklan — Owa eon it iba pang nakitang DNA ag semilya sa bangkay it 23 anyos nga turistang Slovak nga nasapwan nga owa eon it kabuhi sa sangka abandonadong chapel sa Isla it Boracay.
Raya ro ginpahayag ni Police Capt. Aubrey Ayon, tagapaghambae it Special Investigation Task Group (SITG) it Aklan Police Provincial Office base sa resulta it ginpatigayon nga medical examination it forensic team.
Posible suno kana nga owa it nakitang DNA bangud nga una eon sa state of decomposition kat makit-an ro eawas it biktimang si Michaela Mickova.
Apang ginklaru nana nga nagguwa sa resulta it autopsy nga ginhimuslan ro biktima.
Nagapabilin sigon nga daywa ro persons of interest it kapulisan ag maskin nga owa nakita ro andang DNA sa eawas ni Mickova hay padayun ro andang imbestigasyon.
Dugang pa nga bukon pa sanda it mga suspek, apang gin-aresto eamang bangud sa magka-separado nga krimen nga andang nahimo.
Ro sambilog sigon sa mga POI hay naaresto sa sangka anti-drug operation, kun sa siin nauna eon imaw nga nagpaguwa it affidavit nga nagapabutyag nga may nasayuran imaw sa makangieidlis nga pagpatay sa turista.
Sa pihak nga parte, ginpasiguro it Aklan PPO nga magapadayun ro andang follow-up investigation para sa mga dugang nga ebidensya nga magiging bastante agud nga makapasaka eon it kasong kriminal sa mga responsable sa krimen.
Kaibahan sa andang ebidensiya ro impormasyon it pilang indibidwal ag ro mga CCTV footage.
Ginpaabot eon man sigon nanda sa Embahada it Slovakia nga natigayon eon nga ma-cremate ro bangkay ni Mickova ag nakataeanang igapadaea ro anang urn sa anang pamilya sa Slovakia.
Madumduman nga nag-abot si Mickova sa Boracay ko Marso 1, 2025 agud nga magtambong sa kasae it anang amigo nga Filipino.
Marso 10 hay nag-ea-ong raya nga maga-warang sa isla apang owa eon nakabalik pa.
Makataliwan ro daywang adlaw hay nakit-an ro anang bangkay nga owa it eambong nga pang-idaeum sa abandonadong kapilya sa Zone 3, Sitio Pinaungon, Barangay Balabag it nasambit nga isla.
