KALIBO, Aklan–Owa it anuman nga major untoward incident nga natabu sa pagdumdum it Semana Santa sa bilog nga probinsiya it Aklan.
Suno kay PSSgt. Jane Vega, tagapaghambae it Aklan Police Provincial (APPO) pangkabilugan nga naging malinong ro Holy Week makaron nga dag-on base sa assessment it andang taeatapan.
May pilang insidente sigon it aksidente sa daeanon ag away mag-asawa.
Antes pa man suno kana ro event hay kasado eon ro andang security plan partikular ro pagdeploy it kapulisan sa mga lugar nga kaeabanan nga gina-agtunan it mga pumueuyu ag deboto kapareho it Bukid Tigayon, Manduyog Hills, simbahan, terminal, tourist spots, beaches ag iba pa.
Apang nataeupangdan sigon nanda nga kumpara ko nagtaliwan nga mga dinag-on kat owa pa tumama ro covid 19 pandemic, sangkiri eamang ro mga tawo nga nagguwa ag mas ginpili nga sa andang baeay magpamaeandong.
Ginpasaeamatan man sigon nanda ro mga pulis nga hugut nga nagbantay.
Samtang, preparado eon man suno kana ro APPO sa nagahilapit nga eleksyon sa mayo 9 partikular ro deployment it mga tawuhan sa nagkaeain-eain nga polling precincts sa superbisyon it Commission on Elections ukon Comelec.
