KALIBO, Aklan—Owa it anuman nga pagabag-uhon sa ginapatuman nga minimum health standards sa probinsiya it Aklan.
Raya ro ginpahayag ni Ibajay mayor ag League of the Municipalities of the Philippines ukon LMP-Aklan chapter president Joen Miraflores sa pagpaeawig it General Community Quarantine with heightened restrictions it gobyerno sa bilog nga probinsiya.
Gindugang pa kara nga owa eon nag apela si Aklan Governor Florencio Miraflores sa national inter-agency task force agud nga maibalik sa MGCQ ro klasipikasyon it Aklan.
Sa kamatuoran suno kana hay preparado eon ro probinsiya nga mabutang sa mas mataas nga Modified Enhanced Community Quarantine ukon MECQ, apang sa mayad nga swerte hay ginbutang eamang raya nga status quo.
Ginduea man kara ro pagkabaeaka it publiko nga indi eon makaangkon it lockdown kapareho sa natabu ko Marso 2020 bangud nga ro ginatutukan sigon it mga LGUs makaron hay ro pagpatuman it surgical ukon granular lockdown sa mga lugar nga nakalista it pagsirit it kaso it COVID 19.
Samtang, gindugang pa ni Mayor Miraflores nga maka alarma ro sitwasyun makaron sa aklan matapos nga umpisa ko Hulyo 18 hay indi magnaba sa 140 ro covid cases kada adlaw ag may nagakamatay nga 2 hasta 3 nga ka pasyente.
Sa pihak kara, ginpasiguro man nana ro kahauman it mga LGUs sa anuman nga worst case scenario matapos nga may gintaeana sigon sanda nga pondo para sa COVID response.
Ginpahayag dugang nga haeos kada domingo hay may naga abot eon sigon nga covid vaccine sa Aklan rason nga dere-deretso eon ro vaccination program it probinsiya para sa A1, A2 ag A3 nga priority groups.
