KALIBO, Aklan—Uman nga ginpamatud-an it sangka miyembro it Aeta community nga owa it imposible sa tawo nga nagatinguha para maabot ro ginahandom sa kabuhi.
Raya hay bangud nga pilang buean eun lang ro anang kinahangean nga maeampasan agud nga maka-graduate sa kolehiyo.
Sa interbyu it Bombo Radyo, ginpahayag ni Ms. Fretzie Joy Vicente sangka miyembro it Aeta community ag graduating sa anang kursong bachelor in physical wellness major in sports management sa University of Makati nga eubos ro anang kalipay ag pagpasaeamat sa gintao kana nga opurtunidad agud nga makatuon sa kolehiyo.
Sa pihak kara, maabong beses man sigon imaw nga naka-eksperyensiya it pag-insulto bangud sa kakaibang kulay it panit, kulot nga buhok ag sa anang bilog nga personalidad.
Samtang, bangud sa pagpursige ag sa bulig man it anang pamilya, coach ag mga maeapit nga barkada hay nakaangkon imaw it kabaskog it boot nga magpadyun.
Naging miyembro it pilang ka mga sports sa andang unibersidad ag naka-avail it scholarship.
Samtang, nagpanawagan man raya nga punduhon eun ro pag-dicriminate sa mga Ati bangud sa mata it Diyos hay pare-pareho eamang ro tanan.
Samtang sa pihak nga parte, ginpahayag man ni Mr. Clod Tiamson ag sambilog sa mga nagaduso it adbokasiya para sa pagbukas it oportunidad bukon eamang it sa mga Aeta community kungdi sa mga pobreng pomoeuyo nga nakitaan eagi nana potential si Ms. Fretzie Joy Vicente.
Mag-euwas sigon sa anang abilidad hay antigo man si Fretzie nga magsunod sa kung ano ro ginahambae kana.
