KALIBO, Aklan—Owa it kamatuoran nga may shortage sa nurse sa Pilipinas bangud nga sobra-sobra ro numero it mga raya sa kinahangeanon it nasyon.
Raya ro ginpahayag ni Dr. Philip Ian Padilla, public health expert it University of the Philippines ukon UP-Visayas sa interview it Bombo Radyo Kalibo.
Suno kana nga pila sa mga nurse hay gina-obrang stepping stone ro andang experience sa mga ospital sa nasyon agud nga makapag-abroad bangud sa mas mabahoe nga sweldo nga ginabaton ag mga benepisyo.
Dugang pa nga pila sa mga lisensiyadong nurse hay napilitan nga magtrabaho sa guwa it andang profession kapareho it call center, medical transcription ag iba pa bangud sa mas mataas nga sweldo nga ginabaton.
Ginabarat man sigon sanda it mga private hospitals kun sa siin mas mataas pa ro entry salary level sa mga pampublikong ospital.
Samtang, gindugang pa ni Dr. Padilla nga kinahangean nga estudyuhan it mayad it Department of Health ro andang ginaproponer makaron bilang solusyon sa problema nga mag-hire it mga underboard nga nursing ukon kabit-kabit ro score sa board exam ukon 70 hasta 74 bangud nga sandig sa laye ro kinahangean nga boe-on nga empleyado it gobyerno hay ro may eligibility nga nursing board.
Posible sigon raya kon amyendahan ro laye kamana man ro patakaran nga gintaeana it Professional Regulation Commission ukon PRC.
Sa pihak nga parte, in-demand sigon ro mga filipino nurses sa US, Europe ag iba pang Western countries bangud nga sangkiri ro nagabo-oe idtu it kursong nursing nga makabig nga trabahoso.
Ginsuhestiyon ni Dr. Padilla nga kinahangean nga maghueag eagi ro gobyerno pinaagi sa pagtau it financial ag non-financial benefits sa mga nurses agud nga magpabilin sanda sa Pilipinas.
Mabahoe nga problema suno kana sa health care system it nasyon kon padayun nga magasangkiri ro mga nurse sa nasyon.
