NATIONAL News — Ginklaru ni Education Secretary Sonny Angara nga owa sa Comprehensive Sexuality Education (CSE) ro pagturo it masturbation sa mga inunga nga estudyante.
Sa sangka forum sa Kapihan sa Manila Bay, ginpahayag ni Angara nga sa andang pag-usisa hay owa man sanda it nakikitang konsepto it masturbation sa presenteng CSE.
“Naalarma rin kami na may ganu’ng tinuturo. So chineck namin pero mukhang wala naman. Siguro sa ibang bansa ‘yung tinuturo na ganu’ng curriculum,” kaparte it pahayag ni Angara.
Ro CSE hay nakasueod sa K to 12 curriculum nga nagatuyo nga masolusyunan ro problema it teenage pregnancy, sexually transmitted diseases ag gender-based violence.
Raya hay sangka framework nga ginaduso it mga ahensiya it United Nations kapareho it United Nations Educational, Scientific and Cultural Organization, United Nations Children’s Fund ag ro United Nations Population Fund.
Nauna kara, ginkontra it grupong National Coalition for the Family and the Constitution ag Project Dalisay, ro Senate Bill No. 1979 ukon ro Adolescent Pregnancy Prevention Bill bangud sa pag-adopt sa CSE framework.
Nagpromisa mismo si Pangueong Ferdinand “Bongbong” Marcos Jr. nga iga-veto nana ro proposisyon kon magapabilin nga naeakip ro nasambit nga probisyon.
