KALIBO, Aklan—Owa it matabo nga pagbag-o sa ginapatuman nga curfew hour sa banwa it Ibajay.
Raya ro ginklaro ni Ibajay mayor jo-en miraflores sa pakikipag-angot it bombo radyo.
Suno ka nga magapabilin sa dati ro andang ginpatuman nga curfew hours kung sa siin raya hay maga-umpisa alas 9:00 it gabi-e ag magatapos it alas 5:00 it agahon.
Madumduman nga nauna eun nga nagpagguwa it Executive order si Kalibo mayor Emerson Lachica angot sa mas ginpatag-uran pa nga curfew sa banwa nga maga umpisa eun lang it alas 10:00 sa gabi-e ag magatapos sa alas 4: 00 it agahon.
Ginapahayag dugang ni Miraflores nga may kinamatarong ro kada Local government Unit (LGU) nga magpatuman it pagsinoeondan sandig sa kinahangeanon it andang mga residente.
Samtang, ginpahayag man ni Miraflores nga may paeaabuton makarun nga dominggo nga bakuna kontra COVID-19 ro probinsya it Aklan maghalin sa national government.
Apang raya hay nakataeana eamang para sa mga frontline healthcare workers nga nauna eun nga nakabatun it first dose it bakuna.
Samtang, bangud sa padayun nga pagtinaas it mga kaso it COVID-19 sa bilog nga Western Visayas, nagrequest ro mga governors sa national IATF nga makaangkon it moratoruim sa pagpauli it mga travelers sa bilog nga Panay Island.
Gilayon man raya nga gin-aprubahan ag naipatuman kung sa siin nakataeana pang magatapos sa Abril 10.
Samtang, sa pihak nga parte, ginpahayag man ni Miraflores nga sa makarun hay uman nga ginabawaean ro pagbueang ukon cockfighting sa mga lugar nga una sa idaeum it ECQ, MECQ, GCQ ag MGCQ.
Ro ginapasugtan eamang sigon makarun hay ro ginatawag nga E-sabong.
Bangud man sa padayun nga pagtinaas it kaso it COVID-19 sa probinsya it Aklan, uman karang gin-engganyo ro publiko nga padayun nga magsunod sa ginapatuman nga health protocol agud nga mapabilin nga euwas sa paeag it deadly virus.
