KALIBO, Aklan—Owa it na-monitor nga terror threat nga target ro Western Visayas.
Raya ro ginkumpirma ni P/Lt. Col Joem Malong, tagapagghambae it Police Regional Office 6 ukon PRO-6.
Apang nagpadudum si Malong nga kinahangean sa gihapon it publiko nga maging mapagbantay.
Raya hay kasunod it natabu nga magkasunod nga mabaskog nga pagsabog ko lunes nga adlaw sa Jolo, Sulu nga ginkamatay it 15 nga katawo ag ginkanina it 75 nga iba pa.
Suno kay Malong nga dapat nga pirmeng maging alerto ro publiko kontra sa mga makadueuda nga sitwasyon, indibidwal ag mga gin-aywan nga mga bagahe.
Insigidang ipahisayod ro mga raya sa mga otoridad agud nga mataw-an it insigidang aksyon.
Maging mapagbantay sa mga matawong lugar kapareho it mga malls ag mga transport terminals nga kaeabanan nga target it mga terorista.
Kon naga-agto sa mga buildings ukon mga sarado nga mga lugar , pirmeng i-check ro emergency exits.
Indi pag-aywan ro mga importanteng kagamitan.
Gindugang pa ni malong nga gusto eamang it mga terorista nga magpakalhit it kahadlok sa mga tawo agud nga makabo-oe it atensyon sa international media pinaagi sa pagpatay sa mga inosenteng sibilyan ag pagsamad sa mga propiyedad.
Sa pihak nga parte, agud nga masiguro nga mapabilin ro peace and order sa bilog nga rehiyon sais, nagbo-oe it dugang nga 356 nga mga pulis ro PRO-6 agud nga matapna ro mga terorista.
Raya hay ginaeakipan it 292 nga eaeaki ag 64 nga babaye.
Ro andang oath-taking ceremony hay dueueungan nga ginpatigayon virtually nga ginpangunahan ni General Archie Francisco Gamboa, director general it PNP.
Pagkatapos it oath taking, magapaidaeum sanda sa Public Safety Basic Recruit Course sa sueod it 6 nga buean ag pagasundan it dugang nga 6 nga buean nga Field Training Program agud nga eubusan eon nga maging pulis , kun sa siin hay magabaton it sweldo nga P29,668 pesos kada buean mag-eowas pa sa mga allowances ag iba pang benepisyo.
