KALIBO, Aklan—Owa pa it identity ro sangka eaeaki nga nasapwan nga nakasab-eay ag nagaeutaw-eutaw sa baybayon maeapit sa bakhawan nga sakop it Brgy. New Buswang, Kalibo, agahon it domingo.
Suno kay P/Lt. Aubrey Ayon, deputy chief for operation it Kalibo municipal police station nga padayun ro andang pakikipag-angot sa kaiping nga mga estasyon it pulis sa posibleng pagtumod sa pagkatawo it biktima.
Sa andang pag-usisa, owa sigon it napabalitang missing person sa bilog nga probinsiya it Aklan.
Sa pihak nga parte, ginaduea it pulisya ro posibilidad nga may koneksyon ro nakita nga nakahigot nga pamato sa hawak it eaeaki nga puno it baeas.
Sa andang pag-imbestiga, ginagamit sigon raya it mga mangingisda.
Raya hay kasunod it mga espekulasyon nga hungod nga gintagbong ro biktima.
Ro eaeaki hay nakasuksok it sweat shirt nga gray, kulay dueaw nga shorts nga may mga puno it niyog nga design, nagkaeain-eain nga yabe ag nakasuksok it relo nga stainless.
Ginabuebanta raya nga naga-edad it 40 anyos pataas kamana man nga kasarangan eamang ro kataason.
Padayun pa ro imbestigasyon it mga otoridad angot sa pagkatawo it nasapwan nga patay.
Ro bangkay hay presenteng nakahaya sa sangka funeral homes sa bawan it Kalibo.
