KALIBO, Aklan—Owa pa it may nailistang bag-ong variant it COVID-19 virus sa probinsiya it Aklan.
Suno kay Dr. Cornelio Cuatchon Jr., it Provincial Health Office ukon PHO-Aklan nga nag-negatibo ro sangka Aklanon nga nakasakay it sangka pasahero sa eroplano halin sa Dubai nga nagpositibo sa UK variant.
Raya hay base sa resulta it anang swab test.
Masyadong instrikto suno makaron ro gobyerno sa mga pasahero nga naga-uli nga may travel history sa mga nasyon nga may nailistang UK ag South African variant.
Gindugang pa ni Dr. Cuatchon nga nakatutok eon ro Philippine Genome Center, Research Institute for Tropical Medicine ukon RITM ag National Institutes of Health it UP sa pag-examine sa mga sample it COVID-19 patients.
Ro nasambit nga mga laboratoryo pa eamang sigon ro may ikasarang nga mag test it nasambit nga mga bag-ong variant it covid-19.
Agud nga mapugngan ro pagkalhit kara sa nasyon, ro tanan nga mga pasahero halin sa ibang nasyon kaibahan ro mga OFW hay gina-quarantine anay sa sueod it limang adlaw antes nga boe-an it daywang swab specimen para sa covid test.
