KALIBO, Aklan—Ginpahayag ni Malay Tourism Officer Felix Delos Santos nga owa pa it may nagsueod nga dumueuong nga turista sa Isla it Boracay.
Raya hay matapos nga buksan eon it gobyerno ro mga borders sa mga foreign travelers agud nga mapabaskog ro turismo ag ekonomiya it nasyon.
Suno kay Delos Santos nga puro mga domestic tourist gihapon ro nagabakasyon sa isla kun sa siin ko adlaw it Biyernes, Pebrero 11 ro nakalista it pinakamataas nga tourist arrivals sa buean it Pebrero nga nag-abot sa 3,982.
Ginaeauman nga magataas pa raya sa selebrasyon it valentine’s day.
Umpisa Pebrero 1 hasta 11, ro tourist arrivals hay nag-abot sa 20,627.
Ginpahayag dugang nga sa anang pag-usisa, owa pa it may naka-schedule nga international flight sa kalibo international airtport.
Base sigon sa andang pre-pandemic data, kaeabanan nga nagasueod ro mga turista halin sa Asya sa Boracay sa mga buean it Hunyo hasta Agosto bangud nga summer raya sa andang lugar.
Sa pihak kara, ginkumpirma it mga tag-ana ag managers it pilang accommodation establisiments nga may nagpa-book ukon nagpa-reserve eon kanda nga mga foreign tourists.
Apang daywa hasta tatlong buean pa ro naka-schedule nga bakasyon.
Excited eon sigon sanda sa pagbaton it mga turista ag haeos preparado eon ro tanan.
