KALIBO, Aklan—Owa gihapon natapos ro owa pagkailintindihan sa tunga it mga manugturo ag ni Mrs. Monina Besana, presidente it general PTCA it Mambuquiao Integrated School sa banwa it Batan.
Nag-ugat ro isyu sa ginasugid nga mga nagkaeaduea nga kahoy ag yero halin sa gin-repair nga pilang classroom it nasambit nga eskwelahan nga ginasugid nga ginbakae it daywang manugturo nga sanda man mismo ro nag-presyo.
Sno kay Mrs. Besana nga uman sanda nga nag atubang sa barangay council ko lunes nga adlaw, Hulyo 27, apang imbes nga maresolba ro kaso hay mas pang naglabo.
Maskin suno kana ro principal it eskwelahan nga si Mrs. Josaly Sioco hay nagpamalibad nga magpatunga sa isyu.
Gin-insister kara nga indi pa imaw makapatawag makaron it meeting bangud sa pandemya kun sa siin bawae pa ro pagtililipon it mga tawo.
Ginapanindugan ni Mrs. Besana nga bawae ro ginhimo it daywang manugturo bangud nga ro andang gina-alegar nga ginbakae nga mga kahoy ag yero hay government property, mag-eowas pa nga owa raya ginpahisayod kanda nga mga ginikanan bilang miyembro it PTCA ag sa iba pang mga manugturo it nasambit nga eskwelahan.
Gindugang pa kara nga ginapilit imaw it mga eakot nga teachers nga limpyuhan ro andang pangaean.
Gin-insister pa it mga raya nga owa imaw it kinamatarung nga mag reklamo bangud nga sanda ro may poder sa mga gamit sa sueod it eskwelahan.
Samtang, nagaduda sigon ro mga teachers nga may tawo nga sa likod it anang pagreklamo agud nga sanda hay samara bangud sa paksyon sa sueod it eskwelahan.
Sa pihak it pagtinguha it bombo radyo nga maboe-an it pahayag ro mga eakot nga manugturo ag ro principal nga si mrs sioco, apang nagpamalibad ro mga raya nga magkomento.
