KALIBO, Aklan—Ginkumpirma it Aklan Provincial Police Office nga gin-relieve si Police Col. Crisaleo Tolentino sa anang duty bilang provincial director it APPO para sa anang career advancement.
Suno kay PSSgt. Jane Vega, assistant public information officer it APPO nga si Tolentino hay igabutang sa taeatapan it directorate for operations sa kampo krame.
Ro relieve order ni Tolentino hay naging epektibo ko Mayo 16, 2023.
Si P/Col. Victorino Estampador Romanillos Jr., it Regional Community Affairs Development Division it Police Regional Office 6 ro gintaeana bilang officer-in-charge it APPO.
Madumduman nga antes ro pagka-relieve kay Tolentino hay nag-atubang raya sa pagpamati it senado may kaangtanan sa Degamo slay case matapos nga maeakot ro anang pangaean sa natabu nga mga gulo ag serye it paeatyan sa Negros Oriental.
Si Tolentino hay dating na-assign sa PRO-7.
Sa pihak nga parte, gin-relieve man si P/Brig. Gen. Leo Francisco ko nagtaliwan nga domingo bilang regional police director it Western Visayas./
Si Francisco hay iga-assign bilang officer in charge it Directorate for Operations sa Camp Crame.
Nagserbisyo imaw sa Western Visayas police director it masobra sa waeong buean umpisa ko Agosto 2022.
Nakataeana man imaw nga iga promote sa ranggo nga major general nga nagakabagay sa anang bag-ong posisyon.
Si PBrig. Gen. Archival Macala, deputy regional director for Administration it Police Regional Office 6 ro temporaryong nagapungko makaron nga head it PRO6.
