KALIBO, Aklan—Pagatutukan ni P/Major Frenzy Andrade ro nagapadayon nga kampanya kontra sa illegal nga droga, kriminalidad kaparehas it panakawan ag riding in tandem sa anang opisyal nga pagpungko bilang officer-in-charge it Kalibo Municipal Police Station sa turn-over of command ceremony nga igapatigayon sa adlaw it Martes, Oktobre 15 bandang alas-9:00 it agahon.
Suno kay Andrade, kalipay ro anang nabatyagan matapos nga ginpangaeanan ko Oktobre 10 nga maging OIC it Kalibo PNP maskin nga mabahoe nga obligasyon ag responsibilidad ro kaakibat kara.
Agud nga matutukan ag matapna ro insidente it riding in tandem, magabutang imaw it mga PNP personnel sa mga strategic areas kapin eon sa mga hanueod nga lugar sa banwa it Kalibo nga magaserbing mata sa mga indibidwal nga may mga makadueodang hueag.
Si Major Andrade hay haeos 12 anyos nga nagpungko bilang head it Provincial Drug Enforcement Unit ukon PDEU-Aklan ag magapabilin man gihapon imaw sa nasambit nga departamento samtang ginaobligahan ro responsibilidad bilang OIC it Kaibo PNP.
Nasayuran nga uman nga igabalik sa Camp Pastor Martelino ro dating hepe nga si P/Lt. Col Ricky Bontogon.
Samtang, magapabilin mat-a sa andang dating mga posisyon sanday P/Capt. Benny Jones Mendoza bilang deputy chief of police for operations kamana man si P/Major Willian Aguirre hay deputy chief of police for administration.
