KALIBO, Aklan — Ginpirmahan eon ni Aklan Gov. Florencio Miraflores ro contract of loan agreement sa tunga it gobyerno probinsyal ag Development Bank of the Philippines (DBP) officials ku nagtaliwan nga adlaw it Huwebes, Agosto 30.
Raya hay may kabilugan nga P1.53 billion ag may initial availment nga nagabalor it P153 million pesos.
Ro P153 million pesos nga initial availment hay maadtu sa pagbakae ag rehabilitasyon it mga heavy equipments nga paga gamiton sa mga construction projects it probinsya, pagpatindog it oxygen generating plant, pagpa-ayos it lumang building it Aklan Provincial Hospital, Pagbakae it medical waste decomposer ag bridge financing.
Raya hay matapos man nga taw-an it otoridad it SP si Gov. Miraflores nga mag negotiate ag magsueod sa sangka loan contract agreement sa tunga it sangka resolution number 2018-962 nga ginpasa sa ginpatigayon nga 97th regular session ku Agosto 20, 2018.
Ro nasambit nga pag-utang ro nakita nga tikang it gobyerno probinsyal agud nga mapunduhan ro mga nakalinyadang proyekto sa probinsya.
Raya hay bangod sa bukon man it bastante ro presenting budget it probinsya agud nga mapatapos ro mga proyekto nga nakalatag eon.
Mabahoe sigon ro nangin epekto ku pagpasarado it isla it Boracay sa mga lokal ag dumueo-ong nga bisita sa local revenues it probinsya nga nauna eon nga projected sa 2018 annual budget.
