Nag’abot sa haeos P1,000 ro inisyal nga danyos sa nagtuhaw nga sunog sa may parte it Magsaysay Park sa Munisipyo it Kalibo partikular sa bodega it Barangay Affairs Office kabei, alas-8:20 it gabei.
Suno kay FO1 John Riel Magno it Bureau of Fire Protection – Kalibo nga pag’abot nanda sa lugar hay sarado pa ro bodega rason nga gingamitan nanda it force entry ag ginsamad ro mga kandado.
Gilayon nga nagpatigayon it ventilation ag cooling ro BFP Kalibo agud nga maduea ro aso ag hipatay ro kaeayo.
Nasunog ro mga stock nga eambong nga ginatao sa mga naagyan it kalamidad ukon nasunugan man ag ibang combustible materials nga nakatambak sa bodega.
Samtang, padayon pa ro ginahimo nga imbestigasyon sa nasambitan nga sunog.
Nagdeklarar it fire out mga alas-8:50 it gabei.
Padayon man ro padumdom it mga otoridad nga magdahan, sikyaron ro mga wirings , siguraduhon nga nakapatay ro circuit breaker bago maghalin sa baeay ag kun may emerhensiya hay magtawag eagi sa mga otoridad.
Raya man ro unang nailista nga sunog para makaron nga buean it Hunyo.
