KALIBO, Aklan — Gin kumpirma ni Department of Environment and Natural Resources (DENR) Secretary Roy Cimatu nga maghalin sa P10,000 hasta it P200,000 kada adlaw ro iga papanaug nga multa sa sin-o man nga mapamatud-an nga eumabag sa Republic Act 9275 ukon Philippine Clean Water Act of 2004 sa isla it Boracay.
Raya hay mag eowas pa sa kasong pangatubangon sa korte.
Naga padayun hasta sa makaron ro pagtumod it DENR sa bulig it mga eksperto maghalin sa Mines and Geosciences Bureau (MGB) sa mga naga panag iya it natukibang mga iligal nga tubo sa frontbeach nga direktang naga release it mahigkung tubi sa eawod.
Pilang mga negosyante ag residente sa isla ro pa-sekretong naga kakas it mga tubo kada tungang gabie agud makalikaw sa multa ag kaso.
Nauna kara, gin pamilit ni Cimatu nga owa kara gina rekomendar ro uman nga pagbukas it Boracay sa mga turista hasta naga pabilin nga mahigku ro eawod ag owa naga sunod ro mga negosyante sa patakaran.
Base sa Municipal Order No. 307 it Malay, Aklan, ro mga mabahoe nga hotels ag resorts nga may 50 rooms capacity hay obligadong makaangkon it kaugalingong treatment plant ag gina pasugtan nga mag release it wastewater nga pasado sa gin taeanang standard.
Samtang, ro mga may unang 49 rooms capacity panaba hay pwedeng makaangkon it cluster sewage treatment plants sa mga kaiping nga establisimento.
