NATIONAL News — Nasipot ro P1 billion nga quick response funds it Department of Social Welfare and Development (DSWD) matapos gastuson sa mga biktima it limang ulihing tropical cyclones nga tumama sa nasyon.
Suno kay DSWD Undersecretary Edu Punay nga ro nabilin eon lang hay ro P100 million nga standby funds.
Ro mayad nga balita suno kana hay madasig man ro replenishment it pondo pag-abot sa disaster response.
Bangud kara, ginpahayag ni Punay nga nagaeaum ro DSWD nga maipaguwa it Department of Budget and Management (DBM) ro P875 million pondo makaron nga domingo ukon sa masunod nga domingo.
Umpisa ko October 21, naapektuhan eon it tropical cyclones Kristine, Leon, Marce, Nika, ag Ofel ro maabung rehiyon sa nasyon.
Bangud sa epekto it Kristine ag Leon, may kabilugan nga 9,626,456 nga katawo ro naapektuhan ag 158 man ro napabalita nga namatay.
Ginpahayag man it National Disaster Risk Reduction and Management Council (NDRRMC) nga 387,514 nga katawo ro naapektuhan sa pagpanaeasa it bagyong Marce.
Samtang, 195,532 nga katawo ro naapektuhan it mga bagyong Nika ag Ofel.
Nakahalit man sa agrikultura ag imprastraktura ro pagbaha ag landslides sa pagpanaeasa it kan-o eamang it mga bagyo.
Ro bagyong Ofel hay nagapabilin gihapon sa sueod it Philippine area of responsibility.
Samtang, ginpahayag man it state weather bureau nga ro tropical storm nga may international name Man-Yi hay ginaeauman nga magasueod sa PAR sa Huwebes it gabi-i ag pagapangaeanan nga Pepito.
